БА КӢ БОВАР КУНЕМ?
Тибқи иттилои масъулони Раёсати Кумитаи ҳолатҳои фавқулода ва мудофиаи гражданӣ дар вилояти Хатлон, дар ноҳияи Панҷ 12 адад муассисаҳои таълимӣ дар минтақаҳои хафнок ҷойгиранд. Аммо масъулони Шуъбаи маориф ва раиси ин ноҳия мегӯянд, ки дар ноҳия ягон муассиса дар минтақаҳои хавфнок ҷойгир нест.
Ҷамшед Мамадзода: Дар Панҷ 12 мактаб дар минтақаҳои хавфноканд
Ҷамшед Мамадзода, сардори Раёсати Кумитаи ҳолатҳои фавқулода ва мудофиаи гражданӣ дар вилояти Хатлон зимни нишасти хабарӣ гуфт, ки дар вилояти Хатлон 119 муассисаи таълимӣ дар минтақаҳои хавфнок ҷойгир мебошанд, ки аз онҳо 12 ададаш дар ноҳияи Панҷ мебошанд ва дар онҳо 5 ҳазору 46 нафар хонанда таҳсил мекунанд.
Раис: Дар ноҳия ягон мактаб дар минтақаҳои хавфнок нест
Раиси ноҳияи Панҷ Шоҳиён Зарифхӯҷа дар нишасти хабарӣ чунин гуфт: “Ба фикри ман, дар ноҳия ягон муассисаи таълимӣ дар минтақаҳои хавфнок нест. Ин оморро Шумо аз куҷо гирифтает, ман намедонам.”
Аммо Диловар Холов, сармутахассиси Шуъбаи маорифи ноҳияи Панҷ дар нишасти раиси ноҳия афзуд, ки ин омор асоси воқеӣ надорад. Зеро дар ноҳияи Панҷ ягон муассисаи таълимӣ дар мавзеъҳои хавфнок ҷойгир нест. Танҳо дар деҳаи Пахтакор як муассисаи таълимӣ ҳаст, ки он ҳам дар байни деҳа мебошад ва дар минтақаи хафнок нест.
10 минтақаи хавфнок дар Панҷ
Исмонзода Умед, сардори шуъбаи Раёсати Кумитаи ҳолатҳои фавқулода ва мудофиаи гражданӣ дар ноҳияи Панҷ гуфт, ки соли 2022 дар ноҳия тибқи хулосаҳои сарбиологияи ҷумҳурӣ 13 мавзеи хавфнок ба қайд гирифта шуда буд, ки дар соли 2023 аз тарафи гурӯҳи корӣ 3 адад мавзеъҳои хавфнок аз ҳисоб бароварда шуданд. Ҳоло дар ҳудуди ноҳия дар 5 ҷамоат 10 адад мавзеъҳои хавфнок ба қайд гирифта шудаанд. Шояд муассисаҳои таълимиеро, ки дар ҳамин деҳаҳо ҷойгиранд, дар назар доранд.
Дар Хатлон 119 мактаб зери хавф қарор доранд
Дар вилояти Хатлон 119 муассисаи таълимӣ дар минтақаҳои хавфнок ҷойгиранд, ки дар онҳо 56 ҳазору 326 нафар хонанда ба таълиму тарбия фаро гирифта шудаанд. Дар ин бора сардори Раёсати Кумитаи ҳолатҳои фавқулода ва мудофиаи гражданӣ дар вилояти Хатлон Ҷамшед Мамадзода дар нишасти хабарӣ иттило дод. Гуфта шуд, ки аз 119 муассисаи таълимие, ки дар минтақаҳои хавфнок ҷойгиранд, 49 муассиса дар минтақаи Бохтар ва 70 муассисаи дигар дар минтақаи Кӯлоб мебошанд.
Ба гуфти ин шахси масъул, дар ҳудуди ноҳияи Муъминобод 31 адад, Кӯлоб 20 адад, Панҷ 12 адад, Шамсиддин Шоҳин 7 адад, Кӯшониён 6 адад, шаҳри Норак, Балҷувон, Восеъ ва Ҷ.Балхӣ 5 ададӣ, А.Ҷомӣ 4 адад ва дар дигар шаҳру ноҳияҳо аз як то 3 ададӣ мактабҳои дар минтақаҳои хавфнок ҷойгирбуда мавҷуданд.
– Дар шаҳру ноҳияҳои Бохтар, Левакант, Ҷайҳун, Носири Хусрав, Ҳамадонӣ, Данғара, Фархор ва Ховалинг ягон муассиса дар минтақаҳои хафнок ҷойгир нест, – илова кард ин шахси масъул ва гуфт, ки барои баровардани муассисаҳои таълимӣ аз мавзеъҳои хавфнок ҳама чораҳо аз ҷониби Ҳукумати кишвар, МИҲД-и вилоят, Вазорати маориф, мақомотҳои маҳаллӣ ва дигар сохторҳо андешида шуда истодааст.
Раҳмоналӣ ДОДАРХӮҶАЕВ
