Кормандони Раёсати минтақавии Хадамоти давлатии назорат ва танзим дар соҳаи нақлиёт дар минтақаи Бохтар аз ронандагон то роҳбарони Муассисаи давлатии нигоҳдории роҳҳои автомобилгарди шаҳру ноҳияҳо ва масъулони ҷамъиятҳоро ба маблағи бештар аз 1 миллиону 667 ҳазор сомонӣ ҷарима карданд. Сардори Раёсати минтақавии Хадамоти давлатии назорат ва танзим дар соҳаи нақлиёт дар минтақаи Бохтари вилояти Хатлон Шафизода Исроил ба “Фараж” иттилоъ дод, ки аз тарафи кормандони шуъбаю бахшҳо ва нозирони мутасаддии шаҳру ноҳияҳои Раёсат дар 9 моҳи соли ҷорӣ 142 маротиба рейдҳо гузаронида шуда, барои иҷро накардани шарту талаботҳои иҷозатномадиҳӣ ва дигар қоидавайронкуниҳо дар асоси Кодекси ҳуқуқвайронкунии маъмурии Ҷумҳурии Тоҷикистон 6 ҳазору 206 адад протоколҳои ҳуқуқвайронкунии маъмурӣ ба маблағи 1 миллиону 667 ҳазору 256 сомонӣ тартиб дода шудааст. Гуфта шуд, ки ба буҷаи давлат ба миқдори 1 миллиону 214 ҳазору 572 сомонӣ маблағҳои ҷаримаҳои басташуда ворид гардиданд. Аз шумораи умумии протоколҳои тартибдодашуда 389 адад барои бе иҷозат фаъолият намудан, 207 адад барои иҷро нагардидани шарту талаботҳои иҷозатномадиҳй тартиб дода шуда, барои баррасӣ ба суд ирсол карда шуданд.
Ронандагоне, ки меъёри вазнро риоя накарданд, 846 ҳазор ҷарима супориданд. Дар ин давра ҷиҳати иҷрои Қарори Ҳукумати Ҷумҳурии Тоҷикистон таҳти рақми №779 аз 29.12.2009 “Оиди тасдиқи қоидаҳои аз роҳҳои автомобилгард гузаштани воситаҳои нақлиёт бо вазн ва андозаҳое, ки аз меъёрҳои муқарраршуда зиёданд” мутахассисони дидбонгоҳҳои “Панҷи поён”, “Қизил-қалъа”, “Ёвон” ва дигар ҷойҳо муайянгардида ҳаракатҳои воситаҳои нақлиёти боркашро зери назорат қарор дода, барои риоя накардани қоидаҳои ҳамлу нақли борҳои калонҳаҷм, вазнин ва бе сертификати боркашӣ фаъолият намудан нисбати 249 нафар ронандагони воситаҳои нақлиёти боркаш тибқи моддаи 311-и КҲМ ҶТ ба маблағи 846 ҳазору 600 сомонӣ ҷарима баста шудааст. Шафизода Исроил афзуд, ки дар 9 моҳи соли ҷорӣ ҳангоми бурдани корҳои назоратӣ дар ҷамъияту ширкатҳои нақлиётӣ нисбати шахсони мансабдор, аз ҷумла, сардори ҶДММ «Хатлонтранс»-и шаҳри Бохтар, танзимгари ҶДММ «Қурғонтеппа-нақлиёт»-и шаҳри Бохтар, духтури ҶДММ «МНА-17”-и ноҳияи Қубодиён», назоратчии техникӣ, ҶСК “Хизматрасон-11”-и ноҳияи Ҷайҳун, духтури ҶСК “Хизматрасон-11”-и ноҳияи Ҷайҳун, сардори ҶСК “Хизматрасон-11”-и ноҳияи Ҷайҳун, танзимгар-назоратчии ҶДММ «Ҳақназари Кабут»-и ноҳияи Панҷ, сардори филиали ҶДММ «Сайёҳон»-и ноҳияи Ёвон, сардори ҶДММ “Автоэкспресс”-и ноҳияи Ёвон ва сардори ҶДММ “МПМК Хоҷамастон”-и ноҳияи А.Ҷомӣ протоколҳои ҳуқуқайронкунии маъмурӣ тартиб дода шуданд. Ҳатто ба сардорҳо низ ҷарима баста шуд. Номбурда илова кард, ки дар 9 моҳи соли равон барои риоя накардани қоидаҳои нигоҳдории роҳҳо нисбати сардорони Муссисаи давлатии нигоҳдории роҳҳои автомобилгарди шаҳри Бохтар, ноҳияи Кӯшониён, сармуҳандиси Муассисаи давлатии нигоҳдории роҳҳои автомобилгарди шаҳри Левакант, ду нафар устои роҳҳои Муассисаи давлатии нигоҳдории роҳҳои автомобилгарди ноҳияи Хуросон ва устои роҳи Муассисаи давлатии нигоҳдории роҳҳои автомобилгарди ноҳияи А.Ҷомӣ дар асоси моддаи 293-и Кодекси Ҳуқуқвайронкунии маъмурии Ҷумҳурии Тоҷикистон протоколи ҳуқуқвайронкунии маъмурӣ тартиб дода шуд. Инчунин, нисбати ронандаи Муассисаи давлатии нигоҳдории роҳҳои автомобилгарди ноҳияи Хуросон барои риоя накардани қоидаҳои ҳамлу нақли борҳои калонҳаҷм, вазнин тибқи моддаи 311-и КҲМ ҶТ протоколи ҳуқуқваронкунии маъмурӣ тартиб дода шудааст.
Раҳмоналӣ ДОДАРХУҶАЕВ,
“ФАРАЖ”
