Дар остонаи Соли нави 2019 ширкати Tcell бо тӯҳфаҳои идона дар 9 маркази парвариши атфол, ки хонаи бачагон, интернатҳо, марказҳои барои кӯдакони имконияташон маҳдуд ба ин бахш шомиланд, фазои идона орост.
Бобои барфии бунафшранги Tcell ба беш аз 600 кӯдак аз хонаи бачагону парваришгоҳҳо бозичаҳо ва шириниҳо ҳадя кард. Илова бар ин, ҳар як муассисаи бачагона кӯмакҳоеро дастарас кард, ки дар айни замон тарбиятгирандагон ба он ниёз доранд: либоси зимистона, пойафзол, бухории барқӣ ва катҳои хоб.
Парваришгоҳи №1 дар маҳаллаи Чорбоғ ҳамчун ҳадя маҳсулоти беҳдоштӣ (гигиенӣ) гирифт, зеро дар ин ҷо кӯдакони имконияти ҷисмониашон маҳдуд таҳсил ва зиндагӣ менамоянд. Бобои барфии бунафшранг ҳамчунин меҳмони марказҳои тарбияи атфол дар Файзобод ва Шаҳринав гардида, барои онҳо тӯҳфаҳои хоса: бозичаҳо, таҷҳизоти гармидиҳӣ ва либосу пойафзол тақдим сохт.
Бачагони интернати ноҳияи Рӯшони ВМКБ низ зимистони имсоларо бо либосҳои гарму пойафзолҳои зимистона пушти сар хоҳанд кард. Дар минтақаи Шӯроби ноҳияи Исфара бошад, ширкати Tcell тирезаҳои хонаи бачагонро иваз карда, ба ҷои тирезаҳои кӯҳна- тирезаҳои нави пластикӣ насб кард.
Тарбиягирандагони парваришгоҳи бачагонаи ноҳияи Қабодиён соҳиби костюмҳои нав гардида, ҳамроҳ бо Tcell иди Соли навро хурсандона таҷлил намуданд. Дар мактаб-интернати Кӯлоб бошад, ширкати Tcell барои кӯдакони ин даргоҳ мизи идона ороста, барои дар сатҳи хотирмон гузаронидани ҷашн маҳсулоти хӯрокворӣ тақдим кард. Маркази кӯдакони имконияти ҷисмониашон маҳдуди ноҳияи Рашт аз ҷониби ширкати Tcell катҳои хоб ва ҷиҳози онро ҳамчун тӯҳфа қабул намуд.
Муштаракан бо Клуби миллии Федератсияи ЮНЕСКО дар Тоҷикистон ширкати Tcell барои атфоли имконияти ҷисмониашон маҳдуд дар шаҳри Душанбе иди арчаро баргузор намуд, ки зимни он беш аз 100 кӯдак иштирок дошт.
Дар ҷараёни иқдомҳои хайру эҳсонкорӣ, ки дар саросари ҷумҳурӣ идома дошт, ширкати Tcell ба ҳама минтақаҳо- НТМ, Душанбе, вилоятҳои Суғду Хатлон ва ВМКБ кӯмакҳои худро ироа намуд. Теъдоди кӯдаконе, ки аз ширкат ҳадяву кӯмак гирифтанд беш аз 600 нафарро ташкил медиҳад.
Хандаи беғаши кӯдакон, интизорӣ ва боварӣ ба амалишавии орзуҳо, рухдоди мӯъҷизаҳои сеҳрнок дар арафаи ид ва рӯзҳои Соли нав барои атфол амри маъмул ва табиӣ аст. Аз ин рӯ, ширкати Tcell ҳамасола барои онҳое, ки ин ид ва маросимро бесаброна интизор мешаванд, фазои вижаи идона муҳайё месозад. Ҳамчун ширкати масъулияти иҷтимоидошта Tcell ҳамеша лоиҳаҳои хайриявиро баргузор ва сарпарастӣ менамояд. Бо ироаи кӯмак ва дастгирии қишрҳои осебпазири ҷомеъа, ширкати Тсеll вазифаи иҷтимоиашро анҷом медиҳад.
