Федератсияи санъати муҳорибаҳои омехтаи ғайрикасбии Тоҷикистон (TAJMMAF) созмони нисбатан ҷавон аст. Бо гузашти андак замоне дар арсаи байналмилалии варзиш аввалин натиҷаҳо мавҷуданд. Бо роҳбари TAJMMAF, раиси Шӯрои директорони ширкати идоракунии “FIFTYFIVE GROUP” Даврон Ҷӯраев дар бораи он ки чӣ гуна аввалин муваффақиятҳо дар баромадҳои нахустин дар Чемпионати ҷаҳон ва Аврупо ба даст оварда шуданд, инчунин рушди муназзами ин намуди варзиш дар Тоҷикистон суҳбате доштем.
– Даврон Музафарович, мо шуморо бо аввалин муваффақиятҳои варзишгаронатон дар арсаҳои байналмилалии варзиш табрик мегӯем. Нахустин ҳунарнамоии варзишгарони ҷавони ҳунарҳои омехта дар Чемпионати ҷаҳон дар Булғористон ва муваффақият дар Чемпионати кушоди Аврупо дар Қазонро чӣ гуна арзёбӣ мекунед?
– Аввалин мусобиқаи байналмилалӣ барои варзишгарони мо дар соли ҷорӣ – Чемпионати ҷаҳон байни кӯдакон ва наврасони аз 12 то 18 -сола дар Булғористон дар охири моҳи июл баргузор шуд. Мувофиқи қоидаҳои Федератсияи байналмилалии ҳунарҳои размии омехта (IMMAF), ба варзишгарон дар ягон рақобати варзишӣ зарба задан ба сари рақиб манъ аст, кики ин талабот боиси комилан бехатар ҳисобидани ин намуди варзиш мегардад.
Мо 5 нафар иштирокчиро ба чемпионат таҳти роҳбарии директори иҷроияи федератсия Хушмаҳмад Пиров ва мураббӣ Даврон Абдураҳмонов фиристодем. Бори аввал дар як мусобиқаи бузург, махсусан, дар Чемпионати ҷаҳон, иштирок карда, варзишгарони мо як медали тилло ва се биринҷӣ ба даст оварданд. Фикр мекунам, ки ин як дастоварди бузург аст. Ин аз он шаҳодат медиҳад, ки мо дар ин намуди варзиш истеъдодҳои зиёд дорем. Бо рушди дуруст мо метавонем натиҷаҳои боз ҳам баландтар ба даст орем.
Дар мусобиқаи дуюм, Чемпионати кушоди Аврупо, вазъ каме дигар аст. Баракси чемпионати ҷавонон, рақобат дар ин ҷо зиёдтар аст. Ҳадди ақал 32 довталаб қариб дар ҳар вазн рақобат карданд. Ба далели пандемӣ, бисёр кишварҳо натавонистанд дар ин мусобиқа ширкат варзанд, аммо бо вуҷуди ин, сатҳи рақобат хеле баланд буд. Барои дастаи мо, ин, инчунин, аввалин баромад дар чунин миқёси баланди варзишии байналмилалӣ буд.
Мо тавонистем дар кишвари Олтой ҷамъомади омӯзишӣ ташкил кунем, ки ҳолати ҷисмонии бачаҳо хуб шуд. Рақобат бо русҳо, ки чун мизбон барои ҳар як вазн 4 варзишгарро доштанд, душвор буд. Дар муборизаи аввали ифтитоҳӣ варзишгари мо бо варзишгари соҳибунвони Русия рақобат кард ва ба таври ҳайратовар ӯро бо нокаути техникӣ мағлуб кард. Ин аввалин дархости ҷиддии дастаи мо дар ин мусобиқа буд. Дар натиҷа, аз 12 иштирокчӣ 6 варзишгари мо бо медалҳо ба ватан баргаштанд.
Мехоҳам ба як суол рӯшанӣ андозам, зеро аксар вақт пурсида мешавад, ки чаро мо дар мусобиқаҳои аврупоӣ иштирок мекунем. Тибқи қоидаҳои федератсияи ҷаҳонии IMMAF, ҳама чемпионатҳои қитъавӣ озоданд ва ҳар тими миллӣ аз дигар қисматҳои ҷаҳон метавонанд дар онҳо ширкат варзад. Дар гурӯҳбандии умумии Чемпионати кушоди Аврупо тими мо дар байни ҷавонон ҷойи 4 -ум ва байни калонсолон ҷойи 7-умро гирифт ва бо ин васила аз бисёр дастаҳои пурқувват пеш гузашт. Ин даъвои хеле ҷиддӣ барои муваффақият аст. Нигоҳ доштани натиҷаи бадастомада душвор хоҳад буд, аммо мо кӯшиш мекунем.
Ин дастовард натиҷаи заҳмату тамрин, эътимоди варзишгарон ба худ ва мураббиёни онҳост. Мо бояд ба онҳо эҳтиром гузорем, ки бо вуҷуди надоштани таҷрибаи ширкат дар чемпионатҳои ҷаҳон ва Аврупо, онҳо бори аввал натиҷаи чашмрас ба даст оварданд. Нақши Федератсия дар ин кор низ кам нест. Чунин истеъдодҳоро тавассути интихоб дар мусобаҳои дохилӣ, ки Федератсия ташкил мекунад, пайдо кардан лозим буд. Мо мусобиқаҳо гузарондем, то беҳтаринҳоро интихоб кунем, то ба мусобиқаҳои байналмилалӣ омодагӣ гирем.
– Дастовардҳо ва нақшаҳои наздиктарини федератсия дар рушди санъати муҳорибаи омехта дар ҷумҳурӣ кадомҳоянд?
– Мо 5-уми сентябр барои ширкат дар Ҷоми ҷаҳон ба Прага рафтем. Дар ҳайати тими миллӣ 12 нафар буданд, дар асл, ин ҳамон варзишгароне ҳастанд, ки дар мусобиқаи қаблӣ бомуваффақият баромад кардаанд. Дар Ҷоми ҷаҳон тақрибан 35-40 кишвар ширкат карданд. Сатҳи мусобиқа хеле баландтар аст – ин дуюмин мусобиқа барои варзишгарони ҳаваскори ММА пас аз Чемпионати ҷаҳон аст. Варзишгарони мо 3 медали тилло 1 медали нуқра 4 медали биринҷӣ ба даст оварданд. Рӯзҳои 25-26-уми сентябр дар шаҳри Хуҷанд Чемпионати ҷумҳуриро мегузаронем.
– Барои кушодани маҳфили ММА дар ягон ноҳия чӣ лозим мешавад?
– Барои ин кор бояд шаҳодатномаи федератсияро гиред. Мураббиро мо таълим медиҳем ва ӯ ҳақ дорад дар шаҳри худ таҳти сарпарастии федератсияи мо маҳфил кушояд.
– Оё барои рушди ММА-и ҳаваскорон мураббиён, менеҷерон ва дигар мутахассисон кофӣ ҳастанд?
– Мушкилоти кадрӣ ҳамеша вуҷуд дорад, аммо дар муқоиса бо дигар федератсияҳо мо ҳайати зиёди кориро дорем. Зиёда аз 10 нафар дар соҳаҳои гуногуни федератсия фаъолият мекунанд. Дар моҳҳои оянда, мо як духтурро ба таври доимӣ ба ҳайати корӣ ҷалб хоҳем кард. Мо 20 нафар доварро дар курсҳои махсус омӯзонидаем, ки онҳо дар оянда на танҳо ба набардҳои дохилӣ, балки байналмилалӣ низ хидмат хоҳанд кард.
Бузургтарин монеа забони англисист. Ҳоло онҳо дар пайи омӯзишанд ва забони англисии худро такмил медиҳанд.
– Мегӯянд ки ММА-и ҳаваскоронро ба барномаи олимпӣ шомил кардан мумкин аст? Барои ин дар миқёси ҷаҳонӣ чӣ талошҳое ҳастанд?
– Федератсияи байналмилалӣ кайҳо ба Кумитаи байналмилалии олимпӣ дархост пешниҳод кардааст. Ин намуди варзиш аз бисёр ҷиҳат ба барномаи Бозиҳои олимпӣ мувофиқ аст. Дар чемпионати ҷаҳон ва Аврупо намояндагони зинаҳои ташкилот ҳастанд, ки бо тариқе бо КБО алоқаманданд. Онҳо ба ташкили мусобиқаҳо, маъруфият, хатари ҷароҳат ва дигар меъёрҳо аҳамияти хоса медиҳанд.
Ба наздикӣ мақолае дар танқиди муборизаи бидуни қоида нашр шуд. Федератсияи мо онро қабул накард, зеро он ба санъати муҳорибаи омехта тааллуқ надорад. Муборизаи бе қоида ёдгории солҳои 90-ум аст. Бисёриҳо то ҳол ақида доранд, ки дар санъати муҳорибаи омехта қоидаҳо вуҷуд надоранд. Баракс, санъати муҳорибаи омехта як намуди хуби танзимшудаи варзиш аст, ки онро мақомоти ваколатдор дар зиёда аз 50 кишвари ҷаҳон эътироф кардаанд. Мувофиқи натиҷаҳои мусобиқаҳои гузаронидаи ММА, хулосаҳо мавҷуданд, ки ин намуди варзиш аз рӯи хатари ҷароҳат, дар даҳаи дуюми рейтинг ҷойгир аст.
Мо ягона федератсияи аккредитатсияшудаи санъати муҳорибаи омехта дар Тоҷикистон ҳастем, ки ба ҳама талаботи Кумитаи ҷавонон ва варзиш ҷавобгӯ аст.
