Президенти Русия Владимир Путин қонунеро имзо кард, ки бар асоси он аз шаҳрвандони Русия, ки ба далели гирифтани даъватномаи хидмати ҳарбӣ сафар карданашон ба хориҷа мамнуъ шудааст, супоридани шиносномаҳои ҳатмиро пешбинӣ мекунад. Ҳуҷҷат дар портали расмии санадҳои меъёрии ҳуқуқӣ нашр шудааст.
Тибқи қонун, шахсе, ки бояд ба хизмати ҳарбӣ даъват шавад ва аз комиссариати ҳарбӣ даъватнома гирифтааст, бояд дар давоми панҷ рӯзи корӣ пас аз гирифтани қарор дар бораи маҳдуд кардани хуруҷ аз Русия шиносномаи хориҷиро ба шуъбае, ки онро додааст, супорад.
Ҳуҷҷат то ба охир расидани маҳдудияти сафар, ё то ба охир расидани муҳлати шиноснома нигоҳ дошта мешавад.
Тибқи ҳамин тарҳ, кормандони Хадамоти федеролии амният (ФСБ) ва онҳое, ки аз хидмати ҳарбӣ аз ин хадамот ба муҳлати то панҷ сол аз лаҳзаи рафтанашон барканор шудаанд, бояд шиносномаҳои худро супоранд. Шиносномаҳои онҳо бояд дар ФСБ нигоҳ дошта шаванд.
Ин қонунро Думаи давлатӣ рӯзи 23-уми май қабул кард ва рӯзи 7-уми июн Шурои федеролӣ онро тасвиб кард.
Моҳи апрел Путин қонуни ирсоли даъватномаҳо тавассути портали хидматраcониҳои давлатиро имзо кард. Аз ин пас даъватнома ба номи шахс аз ҳамин портал ирсол мешавад ва баъд ин хориҷшавӣ аз кишвар манъ мешавад. Даъватнома ҳафт рӯз пас аз ворид шудан ба Феҳристи ягонаи шахсони ба хизмати ҳарбӣ супоридашуда ба таври худкор супоридашуда ҳисобида мешавад.
