Аз 1 июл даврии асосии имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ – қисмҳои А (имтиҳон дар заминаи таҳсилоти умумӣ) ва Б (имтиҳон дар заминаи таҳсилоти умумии асосӣ) оғоз мегарданд, иттилоъ медиҳад Маркази миллии тестӣ.
Марказҳои имтиҳонӣ дар заминаи муассисаҳои таълимии таҳсилоти миёнаи умумии 18 шаҳру ноҳияи интихобшудаи ҷумҳурӣ (Исмоили Сомонӣ, Сино, Фирдавсӣ, Шоҳмансур, Рашт, Хуҷанд, Истаравшан, Конибодом, Панҷакент, Бобоҷон Ғафуров, Бохтар, Кӯлоб, Восеъ, Данғара, Кӯшониён, Ҷалолиддини Балхӣ, Шаҳритус ва Хоруғ) ташкил карда мешаванд.
Ба иттилоъи манбаъ, мувофиқи тартиби муқарраркарда шумораи довталабон дар ҳар як синфхонаи имтиҳонӣ бояд аз 15 нафар беш набошад.
Барои довталаб овардани ҳуҷҷату ашёи зерин ҳатмист: шиноснома ё ҳуҷҷати дигари тасдиқкунандаи шахсият (бо муҳр ва сурат), ки мақоми ваколатдори давлатӣ додааст, даъватнома, 2 дона ручкаи одии рангаш сиёҳ (рангҳои дигар иҷозат дода намешавад, зеро варақаи ҷавобҳои бо рангҳои дигар қайдшуда аз ҷиҳати технологӣ дуруст коркард намешавад).
Гуфта мешавад, овардани ашёи зерин қатъиян манъ аст: ҷузвдон, китоб, ҳар гуна навиштаҳо, дафтар, маводи иттилоотӣ, телефони мобилӣ ва дигар таҷҳизоту воситаҳои алоқа ва ҳисоббарор (калкулятор, ноутбук, планшет ва ғайра).
Раванди имтиҳонҳо аз ҳамаи марказҳои имтиҳонӣ тавассути камераҳои назоратӣ дар ҳолати бархат (онлайн) дар Марказ пахш карда мешавад. Марказ барои он тамоми таҷҳизоти заруриро дар ҳар як маркази имтиҳонӣ таъмин кардааст.
Ба таъкиди манбаъ, дар сурати риоя накардани тартибу қоидаҳо ва талаботи муқарраргардидаи имтиҳонҳои марказонидаи дохилшавӣ (ИМД) дар вақти имтиҳон асос барои аз имтиҳон хориҷ кардани довталаб ҳисобида мешавад.
– Комиссияи апеллятсионӣ аризаи довталабро вобаста ба масъалаҳои аз тарафи ӯ риоя нагардидани тартибу қоидаҳо ё талаботи муқарраргардидаи ИМД баррасӣ намекунад. Вобаста ба ин, агар довталаб талаботи мазкурро вайрон кунад, маъмури имтиҳон дар ин хусус санад тартиб дода, ӯро аз имтиҳон хориҷ мекунад ва кори имтиҳонии довталаб аз эътибор соқит дониста мешавад, – мегӯяд манбаъ.
Дар ин баробар, тибқи тартиби муқарраркардаи Ҳукумати кишвар, бо мақсади таъмини ҳуқуқҳои шахсӣ ба арзёбии воқеӣ (объективӣ) ва ҳалли масъалаҳои баҳсталаби марбут ба тартиби гузаронидани имтиҳонҳо ба довталаб ҳуқуқи додани аризаи апеллятсионӣ дар шакли хаттӣ дар бораи вайрон кардани тартиби муқарраргардидаи баргузории имтиҳонҳо дода мешавад.
Қолаби аризаи апеллятсиониро дар бораи вайрон кардани тартиби муқарраргардидаи баргузории ИМД ба довталаб тибқи дархосташ роҳбари маркази имтиҳонӣ медиҳад. Довталаб чунин аризаро дар бораи вайрон кардани тартиби муқарраргардидаи баргузории имтиҳонҳои ИМД пур карда, ба роҳбари маркази имтиҳонӣ месупорад. Роҳбари маркази имтиҳонӣ уҳдадор аст, ки довталабро аз муҳлати баррасӣ ва пешниҳоди натиҷаи баррасии аризаи апеллятсионӣ огоҳ намояд.
Тавре ММТ мегӯяд, натиҷаҳои баррасии аризаҳо ва қарори қабулшуда бо протоколи баррасии аризаи апеллятсионӣ дар бораи вайрон кардани тартиби муқарраргардидаи баргузории ИМД ба расмият дароварда мешавад. Комиссияи апеллятсионӣ довталаб ё намояндаи қонунии ӯро аз қарори қабулкардаи комиссияи апеллятсионӣ огоҳ месозад.
Ҳамчунин, иттилоъ дода мешавад, довталабоне, ки худро барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Тоҷикистон дар марҳалаи иловагии бақайдгирӣ аз 10 то 30 июни соли 2022 номнавис кардаанд, расонида мешавад, ки кабинети инфиродиашон баъд аз 5 июл фаъол карда мешавад.
Дар ин баробат зикр мешавад, довталабоне, ки дар марҳалаи асосии бақайдгирии довталабон аз 1 март то 30 апрел худро номнавис карда, дар марҳалаи иловагии азнавбақайдгирии довталабон аз 10 то 30 июн интихобҳои аввалаи худро тағйир додаанд, мерасонем, ки барои онҳо низ кабинети инфиродиашон баъд аз 5 июл фаъол мегардад.
Даъватномаҳои ҳамаи онҳое, ки дар марҳалаи иловагии бақайдгирӣ ё азнавбақайдгирии довталабон 10 то 30 июн иштирок кардаанд, баъд аз 5 июл омода карда мешавад.
