Кореяи Ҷанубӣ тасмим гирифт, ки то охири сол қонунеро қабул кунад, ки истеъмоли гӯшти сагро манъ мекунад, менависад хабаргузории куриёии «Йонҳап». Ба иттилои ин ниҳод, ин тасмим рӯзи ҷумъа дар ҷаласаи ҳизби ҳокими Ҳокимияти халқӣ гирифта шудааст.
Дар лоиҳаи қонун пешбинӣ шудааст, ки забҳ ва фурӯши гӯшти саг аз соли 2027 комилан манъ карда мешавад.
“Бо дарназардошти афзоиши саршумори ҳайвонот, афзоиши огоҳӣ ва ҳузури байналмиллалӣ дар кишвар, вақти он расидааст, ки ҷомеаи мо ба истеъмоли гӯшти саг хотима бахшад”, гуфт намояндаи ин ҳизб Йу Эуи Донг пас аз ҷаласа.
Худи ҳамон рӯз як гуруҳ аз афроде, ки дар саноати гӯшти саг кор мекарданд, дар назди порлумон тазоҳурот карда, аз фишори ҳукумат ва вакилон ҳамчун таҳдид ба рӯзгори онҳо шадидан интиқод карданд.
Дар ҳамин ҳол, ҳукумат нақша дорад, ки бо пешниҳоди ҳавасмандгардонии молиявӣ коргарони соҳаро ба иваз кардани ҷойҳои корӣ ё бастани тиҷорати худ ҳавасманд кунад. Аммо, чораҳои дастгирӣ танҳо ба онҳое татбиқ мешаванд, ки ба ҳукумати маҳаллӣ ҳисобот медиҳанд ва нақшаи татбиқро пешниҳод мекунанд.
Яъне фермаҳои сагҳо, забҳхонаҳо, тоҷирон ва тарабхонаҳо бояд нақшаи аз байн бурдани гӯшти сагро ба мақомоти маҳаллӣ пешниҳод кунанд, менависад The Washington Post.
