Дастаи мунтахаби футболи Тоҷикистон пас аз комёбии таърихии худ дар қисми ниҳоии Ҷоми Осиё-2023 дар раддабандии Федератсияи байналмилалии футбол (FIFA )ба таври назаррас боло рафт.
Дар раддабандии нави ФИФА тими миллии футболи Тоҷикистон ҳафт зина боло баромада, дар ҷойи 99-ум қарор гирифт. Ин беҳтарин натиҷа дар таърихи тими миллӣ ба ҳисоб меравад.
Дар Ҷоми Осиё-2023 дар Доҳа мунтахаби Тоҷикистон панҷ бозӣ анҷом дод. Даста дар марҳилаи гуруҳии мусобиқот бо Чин мусовӣ (0:0) карда, аз Қатар шикаст хӯрд (0:1) ва бар Лубнон (2:1) зафар ёфт. Дар даври 1/8 ниҳоӣ мунтахаби Тоҷикистон бар тими Амороти Муттаҳидаи Араб (1:1, 5:3 бо пеналтӣ) ғолиб омада, дар даври чорякниҳоӣ аз дастаи Урдун (0:1) ноком шуд.
Дастаи мунтахаби Тоҷикистон пас аз ширкати муваффақ дар Ҷоми Осиё-2023 соҳиби 23,82 имтиёз гардид ва ҳоло 1218,89 имтиёз дорад. Миёни намояндагони Конфедератсияи футболи Осиё (AFC) Тоҷикистон дар зинаи 16-ум ҷой гирифтааст.
