Дар маркази маъмурии вилояти Хатлон шаҳри Бохтар рӯзи 5 феврали соли ҷорӣ ду автомашинаи ширкати “Як таксӣ“-ро бензин пошида, оташ заданд. Дар ин бора Валӣ Бегиҷонзода, сардори қисми ҳарбии Хадамоти оташнишонӣ дар шаҳри Бохтар хабар додааст.
Ба гуфти ӯ кормандони сӯхторхомӯшкунӣ тавонистанд сари вақт оташро хомӯш карда, 12 мошини дигарро аз оташ наҷот бидиҳанд.
Ба иттилоъи манбаъ, ҳодисаи оташ задани ду мошини ширкати “Як таксӣ” дар парки техникии ширкати мазкур, воқеъ дар кӯчаи Садриддин Айнии шаҳри Бохтар, рух додааст.
ОИ “АП” хабар додаст, ки “ба мошинҳо бензин пошидаю оташ задаанд. Мо хулосаи худро ба ШВКД дар шаҳри Бохтар ирсол кардем ва таҳқиқи минбаъдаро онҳо пеш мебаранд”, – изҳор дошт Валӣ Бегиҷонзода.
ВКД хабар дод, ки дар натиҷаи гузаронидани чорабиниҳои оперативӣ-ҷустуҷӯӣ дар ҳудуди вилояти Суғд гузаргоҳи сарҳадии Фотеҳобод зимни фирор аз ҳудудуи ҷумҳурӣ ва пинҳон шудан аз тафтишоти пешакӣ гумонбаршуда шаҳрванд Тешаев Исроил Зоҳидҷонович, санаи таваллудаш 02.04.1997, миллаташ тоҷик, зода ва истиқоматкунандаи шаҳри Бохтар, кӯчаи Баҳор, хонаи 223, оиладор соҳиби 3 фарзанд, пеш суд нашудааст, собиқ ронандаи ҶДММ «Сафар Ориён», машҳур ба «таксӣ 3333» дастгир ва нисбташ бо моддаи 255, қисми 2-и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, номбурда ба ҳабси пешакӣ гирифта шуд.
Муайян карда шуд, ки номбурда ҷинояти мазкурро аз ҳиссиёти бадбинӣ ва ғарази шахсӣ нисбати ронандагони ҶДММ «Сафар Ориён», машҳур бо номи «таксӣ 1111», содир намудааст.
Ширкати “Як таксӣ” моҳе пеш дар шаҳри Бохтар ба фаъолият шурӯъ карда буд.
