Бунёдгузори шабакаи иҷтимоии Telegram Павлел Дуров дар як суҳбат бо блогери маъруфи амрикоӣ Такер Карлсон аз идеяи таъсиси ин шабака, корбарон ва амнияти муколама дар Telegram суҳбат кард.
Идеяи таъсиси Telegram ба Дуров пас аз ҷустуҷӯҳо ва фишорҳои нерӯҳои амниятии Русия ба далели даст кашидан аз нест кардани гуруҳҳои мухолиф дар шабакаи иҷтимоии ВКонтакте пайдо шудааст. Ба гуфтаи Дуров, ҳангоми кофтуковҳо ӯ дарк кард, ки вай усули бехатари иртибот надорад ва фикр мекард, ки барномае, ки муошират бо рамзгузорӣ ҳифз мешавад, шояд як идеяи хубе бошад. Рамзи чунин барномаро Николай бародари Дуров навиштааст ва худи ӯ барои функсияҳо ва тарроҳӣ масъул буд.
Овозаҳо дар бораи таҳти назорати мақомоти Русия қарор гирифтани Telegram, тавре Дуров гуфт, аз ҷониби рақибони мессенҷер паҳн ва дастгирӣ мешаванд, ки афзоиши аудиторияи онро дӯст намедоранд. Ба гуфтаи муассиси мессенҷер, Telegram барои маркетинг “як доллар ҳам” сарф накардааст, аммо дар баробари ин ҳамарӯза 2,5 миллион корбар сабти ном мешавад ва теъдоди умумии онҳо ба 900 миллион расидааст.
Дуров қабл аз расидан ба Дубай, ки ҳоло тими Telegram дар он ҷо қарор дорад, чанд макони дигар, аз ҷумла Берлин, Лондон ва Сингапурро баррасӣ кардааст, аммо дар ҳама ҷо ба мушкилоти бюрократӣ дучор шуааст.
Ба гуфтаи Дуров, вай аслан мекӯшад ба кишварҳое, ки “бозингарони бузурги геополитикӣ” ҳастанд, ба мисли ИМА, Русия ва Чин наравад.
Бо назардошти таваҷҷуҳи хадамоти иктишофии кишварҳои мухталиф, Дуров боварӣ дорад, ки ҳама дастгоҳҳои истифодааш аз нуқтаи назари амният дар маърази хатар ҳастанд.
