Дар вилояти Хатлон нақшаи даъвати баҳории ҷавонон ба сафи Қувваҳои Мусаллаҳи Ҷумҳурии Тоҷикистон дар рӯзи аввал 100 дарсад таъмин гардид. Инро имрӯз раиси вилояти Хатлон Давлаталӣ Саид зимни баромади худ дар чорабинии гусели ҷавонон ба сафи артиш баён кард.
Гуфта шуд, ки дар даврони Истиқлоли давлатӣ, бори дуюм аст, ки иҷрои нақшаи даъват дар вилояти Хатлон дар рӯзи аввал 100 фоиз иҷро мегардад. Ҷавонони вилояти Хатлон маъракаи даъвати баҳорию тирамоҳиро дар рӯзи аввал ва пеш аз муҳлат ҷамъбаст мекунанд ва ба хизмати содиқона ба Ватан раҳсипор мегарданд.
Имрӯзҳо бо саъю талошҳои пайвастаи Президенти Ҷумҳурии Тоҷикистон муҳтарам Эмомалӣ Раҳмон барои фаъолияти рӯзмарраи хизматчиён дар қисмҳои ҳарбӣ шароити зарурии маишиву моддӣ муҳайё карда шудааст. Дар кулли воҳидҳои низомӣ афсарони касбии ботаҷриба барои баланд бардоштани малакаи ҳарбиву ҷисмонии ҷавонон, тарбияи онҳо дар рӯҳияи ватандӯстӣ ва садоқат ба марзу бум фаъолияти босамар менамоянд.
Маъракаи даъвати баҳорӣ ба хизмати ҳатмии ҳарбӣ дар Қувваҳои мусаллаҳи Тоҷикистон 1-уми апрел оғоз шуда то 30-юми май идома меёбад.
