ИФТИТОҲИ МАРКАЗИ ТАЪЛИМИИ СИМУЛЯТСИОНӢ ДАР ДДТХ

Лоиҳаи Рушди таҳсилоти олӣ дар Тоҷикистон аз ҷониби Раёсати Бонки умумиҷаҳонӣ 30-уми июни соли 2015 ба маблағи 15 миллион тасдиқ гардида буд. Ҳадафи асосии лоиҳа таҳияи механизмҳои такмил ва мониторинги сифати таҳсилоти олӣ ва таъмини мутобиқати он ба талаботи бозори меҳнат мебошад. Лоиҳа, ки дар аввали соли 2016 роҳандозӣ шуда, аз ҷониби Вазорати маориф ва илми Ҷумҳурии Тоҷикистон амалӣ гардидааст, барои баланд бардоштани сифати таълим ва таъмини мутобиқати он нигаронида шудааст.

Донишгоҳи давлатии тиббии Хатлон дар чорчӯбаи Лоиҳаи Рушди таҳсилоти олӣ, тавассути иштирок дар озмун дар доираи Барномаи грантҳои озмунӣ барои татбиқи Маркази таълимии симулятсионӣ грантҳо дарёфт намуд.

Ҳадафи асосии лоиҳа модернизатсияи раванди таълим ва баланд бардоштани  сифати тайёрии касбии кормандони соҳаи тиб тавассути таъсис ва муҷаҳҳаз намудани Маркази таълимии симулятсионӣ буд, ки бо ҳадафҳои стратегияи рушди донишгоҳ комилан мувофиқ буд.

Навсозии  барномаҳои таълимӣ мутобиқи тамоюлҳои муосири таҳсилоти тиббӣ дар 4 самти фаннӣ (акушерӣ ва гинекология, анестезиология ва реаниматология, ҷарроҳӣ ва бемориҳои дарунӣ) яке аз вазифаҳои лоиҳа ба шумор мерафт. Вазифаҳои дигари лоиҳа аз баланд бардоштани салоҳияти касбии омӯзгорон ва сифати таълими донишҷӯён тавассути ҳамгироии усулҳои таълими азхудкунӣ, ҳамзамон ташкилу таҷҳизонидани “Маркази омӯзиши симулятсионӣ” иборат буд.

Тибқи нақшаи лоиҳа таҳлили нақшаҳои таълимии ҷорӣ аз рӯйи самти фаннӣ (акушерӣ ва гинекология, анестизеология ва реаниматология, ҷарроҳӣ ва бемориҳои дарунӣ) таҳти роҳбарии мудирони кафедраҳои тахассусӣ гузаронида шуда, 4 барномаи таълимию методӣ дар самтҳои фаннии марказ таҳия ва амалӣ гардид ва барои боз ҳам баланд бардоштани касбияти 120 омӯзгор дар чор самти зикргардида мусоидат намуд.

Дар ин муддат 8 семинари омӯзишӣ гузаронида шуда, бо мақсади омӯхтани таҷрибаи беҳтарини мактабҳои тиббии хориҷӣ оид ба ҷорӣ намудани усулҳои таълими симулятсионӣ дар донишгоҳҳои шарик (Донишгоҳи миллии Қазоқистон Ал – Форобӣ ва Донишгоҳи Павияи Италия) барои аъзои гурӯҳи кории лоиҳа сафари омӯзишӣ доир гардид.

Айни замон, дар Донишгоҳи давлатии тиббии Хатлон Маркази омӯзиши малакаҳои амалӣ фаъолияти хешро ба роҳ монда, дорои 5 синфхонаи муҷаҳҳаз ва 1 дафтари корӣ мебошад. Синфхонаҳо вобаста ба ихтисосҳои тиббӣ бо асбоби аёнӣ ва дастгоҳҳои ҳозиразамон, аз ҷумла маникентҳои реаниматсионӣ ва ҷарроҳӣ, муляжҳо, таҷҳизоти стоматологӣ, ЭКГ  муҷаҳҳаз гардида, донишҷӯён барои рушди маҳорат ва малакаи хеш аз онҳо истифода мебаранд.

Раёсати Донишгоҳи давлатии тиббии Хатлон аз ҳамкорӣ бо ҳамоҳангсозони Барномаи рушди таҳсилоти олӣ дар Ҷумҳурии Тоҷикистон қаноатманд мебошад. Ба шарофати  лоиҳаи мазкур ҳоло донишҷӯёни ДДТХ барои боз ҳам сайқал додани дониш, малака ва маҳорати худ  имконияти бештар пайдо намуданд. Роҳбарияти  донишгоҳ барои намояндагони Бонки умумиҷаҳонӣ, Вазорати маориф ва илми Ҷумҳурии Тоҷикистон ва онҳое, ки дар таъсиси Маркази таълимии симулятсионӣ саҳми арзандаи хешро гузоштаанд, изҳори сипос менамояд.

ҚОИДАҲОИ ҚАБУЛИ ҲУҶҶАТҲОИ ДОНИШҶӮЁН БА ДОНИШГОҲИ ДАВЛАТИИ ТИББИИ ХАТЛОН (ДДТХ) БАРОИ СОЛИ ТАҲСИЛИ 2022-2023

Қоидаҳои қабули ҳуҷҷатҳои донишҷӯён ба Донишгоҳи давлатии тиббии Хатлон (минбаъд ДДТХ) дар асоси Қонуни Ҷумҳурии Тоҷикистон «Дар бораи маориф», Қонуни Ҷумҳурии Тоҷикистон «Дар бораи таҳсилоти олии касбӣ ва таҳсилоти касбии баъд аз муассисаи олии таълимӣ», «Қоидаҳои қабули донишҷӯён ба муассисаҳои таҳсилоти олии касбии Ҷумҳурии Тоҷикистон дар соли таҳсили 2021-2022», “Қоидаҳои қабули донишҷӯён ба муассисаҳои таҳсилоти олии касбии ҷумҳурӣ тибқи квотаи Президенти Ҷумҳурии Тоҷикистон аз 01.05.2020, №254”, Низомномаи намунавии муассисаҳои таҳсилоти олии касбии Ҷумҳурии Тоҷикистон» ва  Оинномаи Донишгоҳи давлатии тиббии Хатлон  таҳия шудааст.

Ба курси якуми ҳамаи факултетҳои ДДТХ шаҳрвандони Ҷумҳурии  Тоҷикистон қабул мешаванд, ки шаҳодатномаи намунаи давлатии таҳсилоти миёнаи умумӣ, дипломи намунаи давлатии таҳсилоти ибтидоии касбӣ, ки дар он гирифтани таҳсилоти миёнаи умумӣ қайд шудааст ва инчунин дипломи намунаи давлатии таҳсилоти миёнаи касбӣ доранд.

Дар ДДТХ омодасозии мутахассисон аз ҷумлаи шаҳрвандони Тоҷикистон ба тариқи буҷавӣ ва шартномавӣ амалӣ мегардад. Шаҳрвандони давлатҳои хориҷӣ,  инчунин хориҷиёну шахсони бетабааи муқимии Ҷумҳурии Тоҷикистон ба ДДТХ  мувофиқи шартномаву созишномаҳои байнидавлатӣ фақат аз тариқи шартномавӣ дар сурати доштани ҳуҷҷати баробарэътирофии таҳсилот, тариқи озмун (суҳбат) ва пас аз пардохти музди таълим қабул карда мешаванд.

Таҳсил дар ДДТХ рӯзона аст. Муҳлати таҳсил мувофиқи «Консепсияи ислоҳоти тиббӣ ва фарматсевтӣ дар Ҷумҳурии Тоҷикистон», ки бо қарори Ҳукумати Ҷумҳурии Тоҷикистон аз 31.10 соли 2008 таҳти №512 тасдиқ гардидааст, дар факултети тиббӣ 6 сол, стоматологӣ 5 сол, педиатрӣ 6  сол  мебошад.

Довталабон ба комиссияи қабул баъди гузаштан аз озмуни Маркази миллии тестии назди Президенти Ҷумҳурии Тоҷикистон ҳуҷҷатҳои зеринро пешниҳод менамоянд:

– ариза ба номи ректор;

– ҳуҷҷат дар бораи таҳсилоти умумӣ (пурра), ибтидоӣ ва миёнаи касбӣ намунаи давлатӣ – нусхаи аслӣ;

– маълумотномаи тиббӣ (шакли №038);

– таҳлили озмоишӣ аз рӯи Гепатитҳои В, С

– маълумотнома аз ҷойи зист

– 8 адад сурат (андозаи 3х4 см);

– шиноснома;

– билети ҳарбӣ ё шаҳодатномаи ҳарбии даъватшаванда;

– хулосаи Хадамоти давлатии ташхиси тиббию иҷтимоии Вазорати тандурустӣ ва ҳифзи иҷтимоии аҳолии Ҷумҳурии  Тоҷикистон дар бораи манъ карда нашудани таҳсил барои довталабони маъюби гурӯҳҳои 1 ва 2-юм дар ихтисос (ҳо)-и интихобкарда.

Шахсоне, ки дар асоси озмуни Маркази миллии тестӣ аз имтиёзҳо бархурдор шудаанд, ҳуҷҷатҳои зеринро ба таври  ҳатмӣ пешниҳод менамоянд:

– ғолибони ҷойҳои аввали озмуни ҷумҳуриявӣ аз рӯи фанҳои химия ва биология соҳиби медали тилло гардидаанд –  тавсияномаи Вазорати маориф ва илми  Ҷумҳурии Тоҷикистон;

– ғолибони ҷойҳои аввали  олимпиадаҳои байналмилалӣ аз рӯи фанҳои химия ва биология соҳиби медали тилло гардидаанд  –   тавсияномаи Вазорати маориф ва илми  Ҷумҳурии Тоҷикистон;

– шахсоне, ки мактаби таҳсилоти миёнаи умумиро бо медали тилло хатм намудаанд – шаҳодатномаи Вазорати маориф ва илми  Ҷумҳурии Тоҷикистон;

– шахсоне, ки ҳамчун маъюби гурӯҳҳои 1 ва 2, мебошанд – шаҳодатномаи тиббӣ;

– ятимон (то 21 сола) – нусхаи  хатти вафоти волидайн   бо тасдиқи идораи нотариалӣ,

Духтарон ва писарон, ки тибқи квотаи Президенти Ҷумҳурии Тоҷикистон тавсия мешаванд, бар иловаи ҳуҷҷатҳои дар боло номбар шуда бояд ҳуҷҷатҳои зеринро пешниҳод намоянд:

• қарори Шӯрои педагогии мактаб;
• тавсияи шуъбаи маорифи ноҳия ё шаҳр;
• роҳхати ҳукумати ноҳия ё шаҳр.

Довталабони зикршуда бояд ҳуҷҷатҳои лозимии тасдиқкунандаро дар муҳлати муқарраргардида, пас аз натиҷаи эълони ММТ  ба комиссияи қабул пешниҳод намоянд. Дар мавриди саривақт пешниҳод накардани ҳуҷҷатҳо ва ё ҷой доштани камбудию норасоииҳо дар ҳуҷҷатҳои тасдиқкунанда, ҳуҷҷати онҳо қабул карда намешаванд.

Факултетҳо ва ихтисосҳои донишгоҳ

Эзоҳ: муҳлати қабули ҳуҷҷатҳо дар асоси эълони такрорӣ  пас озмуни ММТ назди Президенти ҶТ ва озмуни квота  муайян карда мешавад.

Нишонии мо:   735320, н. Данғара,  кӯчаи Исмат Шарифов -3.

Комиссияи қабул Тел.: (83312) 21034, 21029  E-mail:  info@khatmedun.tj

www.khatmedun.tj