Дармонгоҳи стоматологӣ
Арзиш чӣ аст? Агар сода карда гӯем, арзиш ин як нияту ҳадафи нек, мақсаду мароми дарпешгузошта бо умеди пешрафту такомули фаъолияти фикрӣ-амалӣ, як кору амали хайру хуб, интихоби касб аз рӯйи хостаҳои қалбӣ ва дар зиндагӣ татбиқ намудани он, иртиботи дурусту оқилона бо мизоҷони хеш ва масъулиятпазирӣ дар кору зиндагӣ, аз меҳнату заҳмати худ ба хубӣ баҳра бурдан, ризоят аз касбу кори худ, дар оромишу осудагӣ ҳаёт ба сар бурдан ва ғайраҳо мебошад.
Ҳоло сухан дар бораи арзиши кори табиб – стоматологи Дармонгоҳи стоматологии кӯдаконаи рақами 2-и ноҳияи Синои ш.Душанбе Қурбоналиев Диловар Азимович меравад, ки яке аз духтурони ҷавони ин дармонгох мебошад. Ин табиби ҷавон на танҳо бо дастону ҳунар ва чашмони заррабини худ мизоҷони ҷавони худро табобат мекунад, балки бо гуфтору рафтор ва муносибати хубу муомилаи нарму латифаш ба рӯҳи мизоҷонаш оромишу осудагӣ ва умед мебахшад. Зеро арзиши аввалиндараҷаи ҳар як табиб, махсусан, табиби стоматология ин пеш аз ҳама муомилаи хушу аз ҷиҳати психологӣ (рӯҳӣ) наздик шудан ба мизоҷи худ мебошад. Саломатии насли ҷавони муосир саломатии ҷомеаи муосир аст. Ин маънои онро дорад, ки солимии инсон ин солимияти ҷомеаи шаҳрвандӣ аст.
Шоҳиди он ҳастем, ки вақте наврасон бо дарди сахти дандон вориди утоқи табиб мешаванд, аввал ба чеҳраи духтур нигоҳ мекунанд ва ҳамон лаҳза чеҳраи табиб ё онҳоро ҷалб намуда, ба дардашон оромиш мебахшад ё ба дарди онҳо дарди изофагӣ илова намуда, дар дили кӯдак тарсу ҳаросро ба вуҷуд меорад. Қурбоналиев аз зумраи он табибонест, ки бо вуҷуди ҷавон будан ҳам аз лиҳози рӯҳу равонӣ ва ҳам аз ҷиҳати табобат як табиби хубу ҳунарманди кандакору созанда ва аз нав ба дандони бемор ҳаётбахшанда аст. Ва ба беморони ҷавони худ хоҳ дар шакли дандонҳои маснӯӣ бошад, хоҳ табобати дандонҳои аслӣ дармон бахшида, имконияти осудагӣ ва истеъмоли ғизо медиҳад. Худи ман ҳам чандин маротиба бародарзодаҳоямро ба назди Қурбоналиев барои табобати дандонхояшон раҳнамоӣ кардам, ки онҳо аз ҳунару одамгариву муҳаббати духтур ниҳоят розӣ буданд.
Бо таваҷҷуҳ ба ин дармонгоҳ метавон дарёфт, ки тамоми кормандони ин дармонгоҳ бо роҳбарияту масъулони он ҳама инсонҳои хубу бо назму низоманд. Маҳз, Диловар Азимович таҷрибаи кории худро дар ҳамин дармонгоҳ омӯхт ва ҳоло яке аз мутахассисони варзида мебошад. Меарзад, ки чунин табибон дастгирӣ ва қадрдонӣ шаванд. Мо низ аз чунин дандонпизишкон бо ризоятмандӣ сипосгузорӣ мекунем ва хушҳолем, ки кӯмак ва ҳунари волои онҳо ба дандонҳои шикаставу сиёҳшуда аз нав зиндагӣ мебахшанд.
Холиқов З. Қ, табиб стоматолог
Муродова Т, истиқоматкунандаи ноҳияи Сино
