Акрамзода Юсуф Акрам 10-уми декабри соли 1959 дар ноҳияи Темурмалик дида ба олам кушодааст. Соли 1976 мактаби миёнаи рақами 25-и ноҳияи Данғараро хатм карда, ҳамон сол барои таҳсил ба Совхозтехникуми ба номи В.В Куйбишев ба шаҳри собиқ Қӯрғонтеппа омад. Бо дипломи сурх ин муассисаи таҳсилоти миёнаи касбиро хатм намуд. Солҳои 1979-1984 донишҷӯйи Донишгоҳи аграрии Тоҷикистон буд. Дар вазифаҳои гуногуни хизмати давлатӣ кор кард ва ҳоло директори КВДҶ “Тоҷикагролизинг” дар мамлакат аст. Мусоҳибаи навбатии мо бо ин шахсияти азизу муътабаре, ки анқариб 40 сол дар ҷодаи деҳқонӣ, кишоварзӣ, зотпарвариву кӯмак ба барзгарони тоҷик заҳмат мекашад ва бо вуҷуди ба мақому мартабаҳои баланди хизматӣ расидан самимиву заминӣ, фурӯтану хоксор аст, доир мешавад.
– Мусоҳибаи мо роҷеъ ба зиндагиву роҳи тайнамудаатон ва аҷибиҳову ғарибиҳои кору фаъолияти шумо мӯҳтаво мегирад ва мехоҳам аз даврони ширини кӯдакӣ, кошонаи гарму бомуҳаббати падар, беғамиҳои даврони тиллоии умр, мушкилоти таҳсилу дигар паҳлӯҳои рӯзгоратон сӯҳбате анҷом диҳем.
– Хуб аст, Абдурозиқ, аз ташрифатон хело шод шудам
– Саволи аввали ман ҳамин аст, ки шумо хатмкардаи МТМУ ноҳияи Данғара ҳастед, аммо дар ноҳияи Темурмалик ба дунё омадаву чанд сол он ҷо зиндагӣ кардаед. Чӣ муҷиб шуд, ки шумо дар ноҳияи Данғара таҳсил гирифтед?
– Бале, ман дар деҳаи Олмабулоқ, маъруф ба “Дараи Азимбой”-и ноҳияи собиқи Совет, имрӯза Темурмалик ба дунё омадам. Дар қарияи мо мактаби ибтидоӣ буд. То синфи 4 он ҷо таҳсил кардам ва падарам ба хотири идомаи таҳсилоти миёнаи мо ба деҳаи Нурбахш (собиқ Кавракли)-и ноҳияи Данғара кӯч баст.
– Чӣ хотироте аз даврони ширини бачагӣ доред. Кӯдакиро чӣ гуна сипарӣ кардед?
– Хотираҳо зиёданд, аммо пеш аз ҳама корҳои падарам ба ёдам мезананд. Мо 8 бародару хоҳарем. Падарамон иштирокчии ҶБВ буд. Барои тарбият ёфтану аҳли илму маърифат гардидани мо талошҳои зиёд мекард. Новобаста аз номусоидии даврон, имкон фароҳам меовард, то мо таҳсил кунему соҳиби нони ҳалол шавем. Бачагиҳоям мисли аксари бачаҳои рустоӣ бо гӯсфандчарониву алафдаравию кишоварзӣ сипарӣ шуд.
– Орзуҳои ҷавонӣ дар идомаи таҳсилот чӣ гуна тарҳрезӣ шуда буду хати қисмат шуморо ба куҷоҳо бурд?
– Ба соҳаи чорводорӣ иштиёқи бештаре доштам. Соли 1976 бо хоҳиши худам ба шаҳри Бохтари имрӯза, ба Совхозтехникуми ба номи В.В Куйбишев омадам. Бо дипломи сурх омӯзишгоҳро хатм кардаму дар корхонаи зотпарварии ноҳияи Данғара як сол ба ҳайси коргари одӣ кор кардам. Ҳадафам доштани маълумоти олӣ буд, аз ин рӯ ба пойтахт омадам ва ба Донишгоҳи аграрии Тоҷикистон дохил шуда, солҳои 1979-1984 он ҷо таҳсил намудам. Ин мактаби олиро низ бо дипломи сурх ба итмом расонидам ва бо ду диплом ҷӯёи кори муносиб будам. Дар ноҳия ба хоҷагидорӣ, коҳу тойбандӣ ва дигар корҳо машғул шудам.
– Бо ду диплом, он ҳам сурх, тойбандӣ кардед?
– Бале, баъдан то соли 1986 ба ҳайси муовини мудири шуъбаи ташкилии Кумитаи комсомолӣ кор кардам. Ҳамин гуна бо тақозои сарнавишт дар чандин самту соҳаҳои дигар низ фаъолият доштам.
– Кай муовини аввали раиси ноҳияи Данғара таъин шудед?
– То ин вақт дар мансабҳои сарагрономи Хоҷагии бурдоқипарварӣ, раиси Ҷамоати деҳоти “Лолазор” фаъолият доштам. Соли 2007 ба вазифаи муовини аввали раиси ноҳияи Данғара таъин гардидам. Дар ин самт 8 сол кор кардам.
– Аз даврони муовини аввал буданатон дар ноҳияи Данғара хотиротҳои хубе ҳам доштагистед.
– Бале. Татбиқи амалии бунёди боғҳои намунавӣ, ба кор андохтани заминҳои бекорхобида, васеъ кардани майдони токзор аз ҳадафҳои асосии Ҳукумати мамлакат маҳсуб меёфт, ки иҷрои ин ҳама самтҳои кишоварзӣ бар дӯши масъулини соҳа вогузор буд. Бо дастгириҳои Пешвои муаззами миллат дар ноҳия ҳазорҳо гектар боғу токзори нав бунёд шуд. Соҳаи чорводорӣ бо зотҳои сермаҳсулу гӯштӣ рушд бахшида шуд. Дар қитъаҳои солҳои тӯлонӣ беоб хати оби полезӣ таъмин ва сабзавоту полезиҳои ширин кишту истеҳсол карда мешуданд. Дар талу теппаҳои Данғара гандуми лалмӣ кишт мешуд, ки ҳосилнокиаш аз ғаллаи заминҳои обӣ кам набуд.
– Тавре медонем, аз соли 2015 то кунун дар вазифаи директори КВДҶ “Тоҷикагролизинг” фаъолият доред. Ин соҳаро чӣ гуна дарёфтед? Оё воқеан кишоварзони мамлакат тавассути мутахассисони шумо тавонистанд бо техникаҳои гуногуни кишоварзӣ таъмин гарданд?
– Бале, КВДҶ “Тоҷикагролизинг” аз солҳои таъсисёбиаш то ҳоло ҷиҳати иҷрои дастуру супоришҳои Сарвари давлат, Дастгоҳи иҷроияи Президенти ҶТ ва Вазорати кишоварзии ҶТ, ҷиҳати таъмин намудани барномаи озуқавории мамлакат, таъсису мукаммал намудани техника ва таҷҳизоти кишоварзӣ, гузаронидани амалиёти иҷораи молиявӣ ва хизматрасонии техникӣ ба хоҷагиҳои деҳқонӣ, дар ҳама шаҳру вилоятҳо, дар дарёфти қарзҳои имтиёзнок корҳои мақсаднокро ба анҷом мерасонад.
– Ҳадафи бунёди корхонаро мушаххастар баён мекардед?
– Мақсади асосӣ ин ташкили корхона ва Марказҳои хизматрасонии техникӣ дар ноҳияҳо, таъмин кардани деҳқонон бо техникаҳои соҳавӣ ва соири мошинолоти кишоварзӣ, тариқи иҷораи молиявии лизингӣ мебошад. Як деҳқони одӣ наметавонад, ки якбора як трактор ва ё чанд мошинолоту қисмҳои ёҳтиётӣ харидорӣ кунад. Корхонаи мо дар мӯҳлати то чанд сол техникаҳоро ҳамчун иҷораи молиявии лизингӣ қарз медиҳад. Деҳқонон ҳар мӯҳлати дар шартнома зикршуда аз даромади кори деҳқониаш ва истифодаи тамғаи гуногуни тракторҳо маблағро пардохт мекунад ва бо итмоми он соҳиби техника мегарданд.
– Бо фармони Президенти ҶТ аз 22.06.2023 “Дар бораи вусъат додани ҳисоббаробаркунии ғайринақдӣ” аз якуми августи соли равон ҳама гуна пардохтҳо бояд ғайринақдӣ сурат бигиранд. Дар ин механизми пардохт корхона ба душвориҳо рӯ ба рӯ нашуд?
– Не! Шуруъ аз ҳамон давра инҷониб амалиёти пардохт тавассути кортҳо сурат гирифта, то ҳол ҳеҷ монеае пеш наомадааст.
– Ҷаноби Олӣ дар Паёмҳои ҳарсолаашон роҷеъ ба воридшавии техникаҳои тасмачарх, ки мӯҷиби шудгори сифатноку сермаҳсулии зироат мегардад, таъкидҳо мекунанд. Дар ин самт чӣ корҳо ба анҷом расонидед?
– КВДҶ “Тоҷикагролизинг” бо дастгириҳои Ҳукумати ҶТ оид ба ворид намудани техникаю мошинолоти кишоварзӣ, аз ҷумла тракторҳои тасмачархи муқтадир чораандешӣ карда, то имрӯз бисёре аз ноҳияҳоро бо ҳамин гуна техникаҳои шудгоркунда таъмин намуданд.
– Аз кадом кишварҳо бештар техника ворид мекунед?
– Аз Федератсияи Русия, Ҷумҳурии Беларус, Чин тибқи созишномаҳо тамғаҳои гуногуни тракторҳоро ба Тоҷикистон меорем.
– Дар ҳама ноҳияҳо Марказҳои хизматрасонии техникӣ доред?
– Бале, дар ҳама ноҳияҳо чунин МХТ-ҳо дорем ва оянда мақсади ташкили устохонаҳои таъмирӣ ва таъмини онҳо бо дастгоҳҳои ёридиҳанда, дастгоҳҳои кафшергарӣ, ҳарротӣ, оҳангарӣ, пармакунии барқӣ ва ғайра дониста мешавад.
– Сипосгузорам аз суҳбати гарму самимӣ.
– Саломат бошед!
PS. Акрамзода Юсуф Акрамро ду даҳсола бештар аст, ки мешиносам. Роҷеъ ба инсонияту маърифат, одобу тамкин, рафтору гуфтору муҳаббати самимонааш бо атрофиён, сахтгириву серталабӣ дар масъулияти бардӯшдоштааш маълумоти кофӣ дорам. Инсонест озодаву бо ғурури миллӣ, мардест фурӯтану хоксору заминӣ, роҳбарест дилсофу поктинату беғаразу бекина ва меҳрпайванди Ватан. Дар кори хеш олиманду дар пешбурди умру зиндагӣ бо донишу хирадманд.
Акрамзода Юсуф ошиқи меҳнат, ошиқи замин, сомонбахши рисолату вазифаҳои хидматии хеш аст. Аз як рустои озода, аз як хонаводаи одӣ рушд кард ва ба мақоми арзандаи роҳбарии як ниҳоди асосӣ дар самти деҳқонӣ расид. Албатта, дар ин пайроҳа барои як марди доно ҳеҷ маҳдудияте вуҷуд надорад. Зеро дар касбу пешаву масъулияти хеш ва ҳамчун аъзои Ҳукумати ҶТ дар канори Сарвари давлат содиқу вафодору қаноатпеша аст. Акрамзода Юсуф ҳеҷ гоҳ талош накардааст, ки муваффақу пирӯз бошад, балки ҳамвора талош менамояд, ки миёни ҷомеа арзишманд бошад ва ин барояш кофист. Хизматҳои дар роҳи ободии Ватан анҷомдодаи ӯ аз ҷониби Ҳукумати ҶТ ва Президенти мамлакат, муҳтарам Эмомалӣ Раҳмон мавриди таваҷҷуҳи хоса қарор гирифтааст. Ӯ дорандаи медали “Хизмати шоиста” ва Ифтихорномаи Президенти ҶТ аст. Мусоҳибаи мо бо директори КВДҶ” Тоҷикагролизинг” ба замоне рост омад, ки эшон зодрӯз доранд. Дар ин ҷашни фирӯз ва камолоти умри инсонӣ барояш хонаи ободу осуда, тану сиҳат, муваффақияту комгорӣ ва сарафрозию сарбаландӣ таманно менамоем.
Азиззода АБДУРОЗИҚ
