Шаб ба хайр, дӯсти ҷавонмаргам!
Ҳоло мондаю хаста аз чорабинии рӯзи озодии баён, ки дар толори “Хилтон” доир шуд, баргаштам. Ҷоизаи ба номи ту ба ду нафар аз ҳамкасбони муваффақат додаму ин сатрҳоро барои ту менависам…
Ёдат ҳаст, дилгаҳи шабҳо ҳар гаҳе хаста мешудӣ ба ман менавиштию менавиштӣ, маро безор мекардӣ, акнун навбати ман.
Аз ғами Исфараю дарди Воруху Чоркӯҳ мегуфтию мегуфтӣ, писарамакат, он шаҳиди роҳи ҳимояи миллатро аз аҷнабиро ҳам аз даст додӣ ва оқибат маро байни ин қадар кару гунгҳо партофтию рафтӣ.
Дӯстам! Маро мегуфтӣ, ки “Хуршед бояд нанолад” ва ҳамеша он ҳарфи дӯст ва ҳамкасбамон Сайёфи Мизробро такрор мекардӣ:
“Ба Хуршед фақат ханда мезебад, хандаи баланду осмонкаф”… Ёдам меояд бо бобои Эшон ба сад сӯзу дард аз зиёфати ҳукуматӣ дар Ворух гурехта, ба манзилат омадем то ашки чашми Муҳаммадиқболро тоза кунем. Эшон бо овози баланд оят мехонду ҳарфи тасалло мегуфт, аммо дар пеши чашмам лаҳзаҳои бо ту будан миёни қатраҳои ашк мечархиду мечархид…
Иқбол, Муҳаммадиқболи яккаписарат ба аёдати ман омад… Чунон ҷавони зебои домодзеб шудааст, ки аввал аз он пурсидам, ки арӯс ёфтааст ё не… Хандиду ваъда кард, ки ҳамин ки Нӯшозари рафиқашро зан додам, риштаро ба дасти янгаи азиз месупорад то барояш арӯс ёбад. Модар паҳлуи фарзандонаш аст ва хатми Донишгоҳи Муҳаммадиқболро интизор аст.
Иқбол, барои ман “рӯзи газета” аст. Ба қавли ту “рӯзи ҷонканӣ”. Ҳоло ин сатрҳои парешонро менависаму саҳифабанд аз он суй дод мезанад, ки дер шуд…
Э марди Худо, чаро намепурсӣ, ки ҷойизаи ба номи ту таъсисдодаамро ба кӣ додам?
Маъмури Юсуфзод, он шогирди муваффақат ва Ҳаётҷони Одили он замон навроҳро ёд дорӣ? Ҳарду ҳам соҳибному соҳибиззатанд, яке дар Хуҷанд ва дигаре дар Ашт… Барои бовар карданат сураташонро мегузорам то бовар кунӣ…
Хайр дӯсти ҷавонмаргам ту дам гир ва дур нест назди ту рафтани мо ҳам… аммо ҳоло лоиқ ба он қадрдоние нашудаем, ки мисли ту дусти азизам мактаберо ба номамон гузоранд. Ҳоло аз он мактаб муфассал менависам, зеро нияти рафтан ба он мактабе, ки ба номат дар Исфара гузоштанд, дорам… Хайр, то номаи оянда…
