Рӯзи ҷумъаи 27-уми сентябр дар меҳмонхонаи “Кангурт”-и Душанбе як семинаре баргузор шуд, ки дар пешорӯи асосноккунии фаннӣ-иқтисодии сохтмони метро дар пойтахти Тоҷикистон расман ба роҳ монда шудааст.
Дар семинар роҳбарону намояндагони вазоратҳои нақлиёт, корҳои хориҷӣ, рушди иқтисод ва савдо, молия, Кумитаи давлатии сармоягузорӣ ва идораи амволи давлатӣ, кумитаҳои меъморӣ ва сохтмон, заминсозӣ ва геодезии назди Ҳукумати Ҷумҳурии Тоҷикистон, Мақомоти иҷроияи ҳокимияти давлатии шаҳри Душанбе, Корхонаи воҳиди давлатии «Роҳи оҳани Тоҷикистон», ҶСП «Шабакаи интиқоли барқ, Сафорати Ҷумҳурии Корея дар Ҷумҳурии Тоҷикистон, Ширкати «Роҳи миллии Корея» (KORAIL), инчунин ширкатҳои дахлдори Ҷумҳурии Корея – «Deahan Consultants Co. Ltd. (барои тарҳрезии хок ва нақб), Dong Myeong Engineering Consultants & Architecture Co., Ltd. LTD» (муҳандисии сохторӣ), «Asia Railway Technology» (сигналҳо ва системаи алоқа), «Sejong Engineering Co.Ltd» (талабот ва тақсими нерӯи барқ), мутахассисони соҳаи нақлиёти роҳи ҳарду кишвар иштирок доштанд.
Қаблан, 14 марти соли 2022 миёни Вазорати нақлиёти Ҷумҳурии Тоҷикистон ва Ширкати миллии роҳи оҳани Корея дар омӯзиши имкониятҳои бунёди роҳи оҳани шаҳрӣ ва нақлиёти роҳи оҳани сабук дар шаҳри Душанбе Ёддошти тафоҳум ба имзо расида буд. Тибқи ин ҳуҷҷат, дар Ҷумҳурии Куриё 3 маротиба семинарҳои омӯзишӣ ва сафари омӯзишии мутахассисони Тоҷикистон ва тақрибан 10 маротиба вохӯриҳои гуруҳи кории доимии ҳарду кишвар ба таври фосилавӣ гузаронида шуданд.
Дар ин давра мутахассисони ҳарду кишвар харитаи масири эҳтимолии ин тарҳ, вазъи бандшавии нақлиёт дар шаҳр, динамикаи ҳаракати нақлиёти ҷамъиятӣ ва афзоиши аҳолӣ дар шаҳр, афзоиши марзҳои ҷуғрофӣ ва вазъияти иҷтимоию иқтисодии онро баррасӣ карданд.
Марҳилаи омӯзиши имкониятҳои бунёди метрои шаҳри Душанбе бо маблағгузории Бонки содироту воридотии Куриё Exim Bank анҷом дода шуд, ки натиҷаи он 22 майи соли 2024 бо иштироки намояндагони вазоратҳои дахлдор муаррифӣ гардид.
