Аз 15 то 18-уми октябр дар шаҳри Душанбе Синамоҷоизаи дуюми миллии “Тоҷи Сомон” баргузор гардид. Ин фестивали кино таҳти унвони “Қадршиносии ҳунари асил” сурат гардид.
Шоми 17-уми октябр дар кохи “Суруш” маросими ҷоизасупорӣ доир гардид. Дар ин маросим филми ” Дар талоши ҳақиқат” аз МД “Тоҷикфилм” дар коргардонии Манзаралӣ Шералӣ, дар 2-юмин Синамоҷоизаи миллии “Тоҷи Сомон” сазоровори ҷоизаи “Беҳтарин филм” гардид.
Филми мазкур аз рӯи асари детективнавис ва рӯзноманигори шинохтаи тоҷик Хуршед Атовулло рӯи навор омадааст. Ва ин ҷоиза нахустин ҷоиза мебошад, ки филми номбурда ба даст овард. Бояд ёдовар шавем, ки филми “Дар талоши ҳақиқат” охири соли гузашта филмбардорӣ гардид ва нахустнамоишаш ҳам охири соли гузашта дар кохи “Наврӯз”-и шаҳри Душанбе баргузор гардида буд.
Ба таъкиди МД ” Тоҷикфилм” дар доираи ин синамоҷоиза, Рӯзҳои кинои Ҷумҳурии Исломии Эрон, Ҷумҳурии Беларус ва Федератсияи Русия, Форуми байналмилалӣ бахшида ба 95-солагии Тоҳир Собиров, Питчинги байналмилалии лоиҳаҳои синамоӣ, дарсҳои “Устод ва шогирд” ва Шурои директорони киностудияҳо ИДМ баргузор гардид.
Гуфта мешавад ,ки ҳамзамон дар доираи Синамоҷоизаи дуюми миллии “Тоҷи Сомон” филмҳои ҳунарӣ, мустанад, бадеии кӯтоҳ ва тасвирии миллӣ намоиш дода мешаванд.
Ёдовар мешавем, ки Синамоҷоизаи миллии “Тоҷи Сомон” бо мақсади ба таври шоиста муаррифӣ намудани манфиатҳои миллӣ, тарбияи эҳсоси ватандӯстӣ, ифтихор аз миллати созанда, тавсифи табиати зебои диёр, ҷалби сайёҳон, дарёфти истеъдодҳои нодир дар соҳаи синамо дар доираи “Барномаи рушди кинои Ҷумҳурии Тоҷикистон барои солҳои 2023-2027” доир мешавад.
Синамоҷоизаи дуюми миллии “Тоҷи Сомон” ба Рӯзи кинои тоҷик (16 октябр) ва 95-солагии коргардони маъруфи тоҷик Тоҳир Собиров бахшида шудаааст.
Б. Раҳматуллоев
