Тими миллии наврасони то 16-солаи футболи Тоҷикистон дар 17-умин мусобиқаи “Ҷоми Рушд”, ки аз 5-ум то 14-уми феврал дар шаҳри Мински Белоруссия баргузор мешавад, иштирок мекунад. Дастаи мунтахаби наврасони кишвар дар ин мусобиқот зери раҳбарии срмураббӣ зайниддин Раҳимов баромад хоҳад кард.
Тибқи иттилоъи Федератсияи футболи Тоҷикистон, дар ин мусобиқа 10 даста ба ду гурӯҳ тақсим шуда, барои ба даст овардани ҷом мубориза мебаранд. Мунтахаби Тоҷикистон (U-16) дар гурӯҳи “А” бо тимҳои миллии Беларус (U-17), Қазоқистон, Озарбойҷон ва Эрон бозӣ мекунад. Ба гурӯҳи «В» мунтахабҳои Беларус (U-16), Молдова, Баҳрайн, Ӯзбекистон ва Исроил шомиланд.
Мувофиқи низомномаи мусобиқа, дастаҳо дар марҳилаи гурӯҳӣ аз рӯи низоми даврӣ дар як давр бозиҳои худро баргузор мекунанд. Баъдан, ғолибони гурӯҳҳо дар бозии ниҳоӣ байни ҳам рақобат мекунанд. Дастаҳое, ки дар гурӯҳҳои худ ҷойҳои дуюмро мегиранд, барои медалҳои биринҷӣ мубориза мебаранд. Инчунин, бозиҳои тасаллобахш барои ҷойҳои 5-6, 7-8 ва 9-10 низ доир мегарданд.
Иштирок дар ин мусобиқа барои дастаи мунтахаби наврасони то 16-солаи Тоҷикистон як марҳилаи омодагӣ ба бозиҳои интихобии Ҷоми Осиё-2023 арзёбӣ мегардад. Марҳилаи интихобии Ҷоми Осиё-2023 аз 1-ум то 9-ум октябри соли ҷорӣ баргузор хоҳад шуд.
Ёдовар мешавем, ки аз ин қабл тими миллии наврасони кишвари мо се маротиба дар мусобиқаи “Ҷоми Рушд” ширкат варзида буданд. Қаҳрамони феълии мусобиқа низ миллипӯшони тоҷик ба ҳисоб мераванд.
Мусобиқаи байналмиллалии “Ҷоми Рушд” сар аз соли 2005 дар шаҳри Мински Ҷумҳурии Белоруссия аз ҷониби Федератсияи футболи ин кишвар таҳти сарпарастии Бонки Рушд гузаронида мешавад.
Мусобиқаи байналмилалии “Ҷоми рушд-2022” дар Минск
Гурӯҳи «А»: Белорус (U-17), Қазоқистон, Озарбойҷон, ТОҶИКИСТОН, Эрон;
Гурӯҳи «В»: Белорус (U-16), Молдова, Баҳрейн, Узбекистон, Исроил;
Муҳаммадназар НАҶМИДДИНОВ
