Иёлоти Муттаҳида маҳдудиятҳо дар мавриди истифодаи мушакҳои амрикоии ATACMS барои ҳамла ба қаламрави Русияро лағв кард. Дар ин бора манбаъҳо дар маъмурияти президенти ИМА Ҷозеф Байден хабар доданд, менависад The New York Times рӯзи 17-уми ноябр. Ин тасмим ба ширкати Куриёи Шимолӣ дар амалиёти низомии Русия алайҳи Укроин марбут аст.
Ба навиштаи хабаргузории NYT, Вашингтон ба Укроин иҷоза додааст, ки барои зарба задан ба низомиёни Русия ва Кореяи Шимолӣ дар минтақаи Курск аз силоҳи дурбурд истифода кунад. Ин вокуниш ба амалкарди Маскав, ки гӯё нерӯҳои Куриёи Шимолиро ба ҷанг ҷалб кардааст, гуфта мешавад. Масъулони Кохи Сафед, ки хостори ифшо нашудани номашон ҳастанд, мегӯянд, Иёлоти Муттаҳида мехоҳад ба Куриёи Шимолӣ нишон диҳад, ки ширкати он дар низоъ ғайри қобили қабул аст.
Укроин метавонад “дар рӯзҳои наздик” аз ATACMS истифода кунад, хабар медиҳад Reuters. Тафсилоти амалиёти пешбинишуда ифшо нашудааст. Мушакҳо қодиранд ба ҳадафҳо дар масофаи то 300 километр зарба зананд.
Мақомоти Вашингтон ва Киев то ҳол аз шарҳи ин мавзуъ худдорӣ кардаанд.
Дар ҳамин ҳол, Маскав танҳо бо изҳороти намояндаи вазорати хориҷаи Русия Мария Захарова, ки аз изҳороти қаблии Владимир Путин ёдовар шуд, маҳдуд шуд. Раҳбари Русия қаблан изҳор дошт, ки ҳамла ба қаламрави Русия бо силоҳи ғарбӣ ҳамчун ширкати мустақими NATO дар низоъ арзёбӣ мешавад.
