Маркази матбуоти ВКД хабар медиҳад, ки дар як садамаи марговари нақлиётӣ дар Ваҳдат, ки ду мошини мусофиркаш ба ҳам бархӯрдаанд, 6 мусофир ва ду ронанда ба ҳалокат расидаанд.
Гуфта мешавад, ки рӯзи 28-уми декабри соли 2019, тахминан соати 14:40, дар роҳи мошингарди деҳаи Элоки шаҳри Ваҳдат, ронандаи автомашинаи тамғаи “Опел-Астра”, Иззатов Шамшод Хушвахтович, соли таваллудаш 1998, сокини ноҳияи Муъминобод, ҳангоми ҳаракат аз самти шаҳри Кӯлоб ба самти шаҳри Душанбе, дар шоҳроҳи “Душанбе-Кӯлоб-Хоруғ” аз уҳдаи идора кардани воситаи нақлиёт набаромада, ба муқобили ҳаракати роҳ баромада, ба автомашинаи тамғаи “Опел-Астра”, таҳти идораи ронанда Саидов Амир Маҳмадёрович, соли таваллудаш 1962, сокини шаҳри Норак, ки аз самти шаҳри Душанбе ба самти шаҳри Норак ҳаракат мекард, бархӯрдааст.
Дар натиҷа, ронандаи автомашинаи тамғаи “Опел-Астра”, Иззатов Ш.Х. ва мусофирони дохили автомашина, шаҳрвандон: Холова Сафаргул Шарифовна, соли таваллудаш 1959, сокини н.Балҷувон, Холова Бибӣ Шарифовна, соли таваллудаш 1964, сокини ш.Кӯлоб, Ҳотамҷонӣ Миралӣ, соли таваллудаш 1994, сокини шаҳри Кӯлоб, инчунин ронандаи автомашинаи дигари тамғаи “Опел-Астра” Саидов А.М. ва мусофирони ин автомашина шаҳрвандон Маҳмадёров Гулмурод, соли таваллудаш 1950, Саидова Рӯзигул Абдуллоевна, соли таваллудаш 1962, Гулмуродова Ҷумъагул, соли таваллудаш 1955, сокинони шаҳри Норак, ҷароҳатҳои гуногуни вазнини ҷисмонӣ бардошта, дар ҷойи ҳодиса ба ҳалокат расидаанд.
Инчунин мусофири дигари дар дохили автомашинаи мазкур буда, Маҷидова Маликмоҳ, соли таваллудаш 1986, сокини ноҳияи Восеъ, ҷароҳати ҷисмонӣ бардошта, дар беморхонаи марказии шаҳри Ваҳдат бистарӣ гардидааст.
Аз рӯи ин ҳодиса таҳқиқ идома дорад.
