Оҷонсии суғуртаи иҷтимоӣ ва нафақаи Тоҷикистон дар нишасти хабарии имрӯз, 7-уми феврал, аз созишномаи ҷониби Тоҷикистону Русия хабар дод, ки дар асоси он муҳоҷирони кории тоҷике, ки расман дар Русия кор мекунанд, метавонанд барои дарёфти нафақа муроҷиат кунанд.
Дилмурод Давлатзода, директори Оҷонсӣ, гуфт, ин созишнома моҳи сентябри соли 2021 имзо шуда буд, вале барои дарёфти он муҳоҷирони кории тоҷик бояд дар Русия расман кор кунанд ва маошашон суғурта шуда бошад.
Ба гуфтаи Давлатзода, Оҷонсии суғуртаи иҷтимоӣ ва нафақаи Тоҷикистон бо Қирғизистон ва Ӯзбакистон низ бо мақсади рушди ҳамкориҳо дар заминаи нафақа ва суғуртаи иҷтимоӣ созишнома ба имзо расонидааст.
Раиси оҷонсӣ гуфт, ки кадом тоифаи муҳоҷирони кории тоҷик, ки дар Русия кор мекунанд, метавонанд ба гирифтани нафақаи русӣ умед банданд.
Аммо дар ҳамин ҳол хабаргузории Азия-Плюс бо такя ба манобеаш шарҳ медиҳад, ки агар муҳоҷир танҳо маблағи патентро барои кор дар Русия пардохт кунад, ин маънои онро надорад, ки дар оянда ӯ метавонад дар онҷо нафақа бигирад. Дар баробари патент бояд бо корфармо шартнома, дафтарчаи меҳнатӣ ва рақами суғуртаи суратҳисоби шахсии инфиродӣ дошта бошад. Корфармо бояд ҳар моҳ барои ҳар як корманд, ба Хазинаи нафақаи Русия маблағи суғурта супорад.
Тибқи созишномаи баимзорасида корманд ҳангоми кор дар Русия метавонад худаш интихоб кунад, ки дар кадом кишвар мехоҳад нафақа бигирад – дар Русия, ё дар Тоҷикистон.
Агар пас аз ба нафақа баромадан корманд тасмим гирад, ки ба кишвари сеюм, яъне на дар Русия ва на дар Тоҷикистон зиндагӣ кунад, боз ҳам нафақа мегирад. Ҳисобҳо аз ҷониби кишваре, ки ӯ дар он расман кор кардааст ва нафақа додааст, ҳисоб карда мешавад. Яъне, асоси нафақаи оянда ҳамин ҳаққи суғуртае мебошад, ки корфармо барои корманд медиҳад. Ҳиссагузорӣ 22 дарсади фонди солонаи музди корро ташкил медиҳад.
Аз ин 22 дарсад — 6 дарсадаш тарифи ҳамраъй мебошад, ки барои ташаккули пардохтҳои устувор таъйин шудааст ва 16 дарсадаш тарифи индивидуалӣ мебошад, ки аз ҳисоби фонди инфиродии шахси суғурташуда ба ҳисоб гирифта мешавад.
Барои додани шаҳодатномаи суғурта мустақилона шаҳрванди хориҷӣ бояд ба хадамоти Фонди нафақа дар ҷои истиқомати муваққатӣ ё доимии худ муроҷиат кунад.
Ёдовар мешавем, ки дар Федератсияи Русия синни нафақа дар айни замон барои мардон 61,5 сол ва барои занон 56,5 сол аст.
Ҳадди ақали нафақа дар Русия мувофиқи ҳадди ақали зиндагӣ барои нафақахӯрони Русия ҳисоб карда мешавад. Умуман, дар Русия ҳадди ақали нафақа каме бештар аз 10 ҳазор рубл аст, вале ҳар як минтақаи ин кишвар музди меҳнати худро дорад.
Ҳаҷми миёнаи нафақа то 1 январи соли 2022 дар Русия 18 521 рублро ташкил медиҳад.
