Президенти Русия Владимир Путин рӯзи 18-уми июн бо сафари давлатӣ ба Ҷумҳурии Халқии Демократии Куриё (ҶХДК) рафт, хабар медиҳад шабакаи телевизионии Кремл соати 20:46-и рӯзи 18-уми июн бо вақти Маскав.
Ин нахустин сафари давлатии Путин ба Пхенён дар 24 соли ахир аст. Вай бори нахуст соли 2000 бо як сафари корӣ аз Куриёи Шимолӣ дидан кард ва дар он ҷо бо Ким Чен Ир, раҳбари Куриёи Шимолӣ, музокира анҷом дод. Сафар ба ҶХДК бо даъвати раиси Шурои давлатӣ, дабири кулли Ҳизби коргари Куриё Ким Чен Ун сурат гирифтааст, ки рӯзҳои 18 ва 19-уми июн баргузор шуд. Кремл ин сафарро дар шабакаи Телеграми худ эълон карда, сафари давлатиро “дӯстона” номид.
Ин сафар, ба гуфтаи хабаргузории Ройтерз, равобити даҳсолаҳои Русия ва Куриёи Шимолиро тағйир хоҳад дод, зеро ҳарду кишвар бо бунбасти байналмилалӣ рӯбарӯ шудаанд.
Дар мақолаи худ, ки дар саҳифаи аввали рӯзномаи давлатии ҳизби ҳокими Куриёи Шимолӣ нашр шудааст, Путин ваъда додааст, ки “механизмҳои алтернативии тиҷорат ва ҳисоббаробаркуниҳои мутақобиле роҳандозӣ хоҳанд шуд, ки таҳти назорати Ғарб нахоҳанд буд” ва “нақшаи баробар ва тақсимнашавандаи амният дар Авруосиё бунёд мекунад”.
