Дастаи мунтахаби ҷавонони Тоҷикистон (U-19) таҳти роҳбарии сармураббӣ Аҳлиддин Турдиев аввалин пирӯзиро дар Ҷоми миллатҳои араб-2021 дар Миср ба даст овард.
Дар даври дуюми марҳилаи гурӯҳӣ дар гуруҳи В дастаи мунтахаби ҷавонони мо ҳамсолони худро аз АМА бо ҳисоби 3:2 мағлуб кард. Ҳар се голи дастаи мунтахаби Тоҷикистонро Муҳаммадалӣ Азизбоев ба самар расонд.
Дар бозии дигари гурӯҳи В дастаи мунтахаби Марокаш ба дастаи Ҷибутӣ бо натиҷаи 4:0 пирӯз шуд.
Аз рӯи натиҷаҳои ду даври бозӣ, ҷадвали мусобиқаро дар гурӯҳ Марокаш, ки 6 имтиёз дорад, сарварӣ мекунад. Дастаҳои Тоҷикистон ва АМА сеимтиёзӣ доранд.
Акнун, дар даври ниҳоии марҳилаи гурӯҳӣ дар Ҷоми миллатҳои араб-2021 дастаи мунтахаби ҷавонони Тоҷикистон бо ҳамсолони худ аз Ҷибутӣ бозӣ хоҳад кард. Ин вохӯрӣ рӯзи шанбеи 26-уми июн баргузор мешавад ва соати 22:00 ба вақти Душанбе оғоз мешавад.
Шогирдони Аҳлиддин Турдиев дар бозии якум аз дастаи Марокаш бо натиҷаи 1:6 мағлуб шуда буданд. Барои ба даври дигар баромадан футболбозони Тоҷикистон бояд дастаи Ҷибутиро, ки аз заифтарин дастаи ин мусобиқа ба ҳисоб меравад, мағлуб кунанд.
