Дар шаҳри Душанбе “Студияи кӯдакон ва наврасони аниматсия, кино ва комикс-“Cartoon & Movie” ба фаъолият шуруъ кард. Тавре муассиси студия Рустам Орифӣ ба хабарнигори мо иттилооъ дод, онҳо ба қабули кӯдакону наврасон шурӯъ кардаанд.
Дар студияи “Cartoon & Movie” дар се самт – аниматсия, кино ва комикс хоҳишмандон қабул карда шуда, ба онҳо нозукии ин ҳунарҳо омӯзонида мешавад. Чанде қабл Рустам Орифӣ нахустин комикси тоҷикӣ бо номи “Одамкитоб”-ро нашр кард, ки аз ҷониби муштариён ва дӯстдорони ин навъи ҳунар хуш пазируфта шуд. “Одамкитоб”, ё “Bookmаn”, қаҳрамони аниматсионӣ-фантастикӣ буда, аз мутолиаи китоб дорои қувваи аҷибе мегардад ва онро барои иҷрои корҳои нек сарф мекунад.
Ҳоло студия сабти филми бадеии “Чора”-ро оғоз кардааст. Ин филм дар бораи нафароне қисса мекунад, ки дар кӯчаи сарбастаи зиндагӣ раҳгум зада, чораи халосӣ надоранд.
Амони Муҳаммад
