Ба маркази маъмурии вилояти Хатлон – шаҳри Бохтар 15 автобуси ҷамъиятӣ ворид карда шуд, ки онҳоро раиси шаҳри Бохтар Баротзода Файзулло ва дигар масъулон дар даромадгоҳи шаҳр қабул карданд.
Раиси шаҳр зимини қабули автобусҳо қайд, кард, ки ин иқдом бо дастгирии ҳукумати кишвар роҳандозӣ шуда, мақсади асосӣ беҳтар кардани хидматрасонии нақлиётӣ ба аҳолии шаҳр ва ноҳияҳои атроф аст.
– Мо нақша дорем, ин автобусҳо 10 рӯзи аввалро бепул ба мардум хизмат кунанд, то онҳо одат кунанд. Дар нақлиёти ҷамъиятӣ беш аз 40 ҳазор корт роҳандозӣ шуда, хидматрасонӣ ғайринақдӣ мешавад ва барои маъюбону камбизоатон сабукиҳо оварда хоҳанд шуд, – илова кард шаҳрдори Бохтар.
Ба иттилои Сафаров Тоҷиддин, роҳбари гуруҳи тадбиқи нақлиёти ҷамъиятии вилояти Хатлон, имрӯз 15 автобус ба шаҳр ворид карда шуд. Рӯзҳои 7-8-уми моҳи августи соли ҷорӣ боз 26 автобуси дигар, яъне дар маҷмуъ 41 нақлиёти ҷамъиятӣ, ба шаҳр оварда мешаванд.
Ӯ қайд кард, ки аз 41 автобус 20 ададаш дар дохили шаҳр ба сокинон хизмат расонида, 20 адади дигар берун аз шаҳр хизмат мерасонанд.
