Дар пойтахти Тоҷикистон мусобиқаи ҷудои Dushanbe Grand Slam 2025 бо ширкати 226 ҷудокор аз 27 кишвари ҷаҳон ба анҷом расид, ки дастаи мунтахаби ҷудои Тоҷикистон бо 4 медали тило, 3 нуқра ва 4 биринҷӣ дар ҳисоби умумидастаӣ дар ҷои аввал қарор гирифт.
Мусобиқа аз 2 то 4-уми май дар Душанбе баргузор шуд, бахше аз сайри ҷаҳонии Федератсияи байналмилалии ҷудо (IJF) буда, яке аз муҳимтарин оғози мавсими ҷудокорон ба шумор меравад, хабар медиҳад IJF.
Дар ин мусобиқот тими васеи Тоҷикистон иборат аз 36 варзишгар: 28 мард ва 8 зан ширкат дошт. Дар рӯзи аввали мусобиқаи Гран-Slam-2025 ҷудокорони тоҷик ба натиҷаҳои назаррас ноил гардида, панҷ медал ба даст оварданд. Нуралӣ Эмомалӣ дар вазни то 66 кило дар даври ниҳоӣ бар ҳамватани худ Обид Ҷебов, партоби кошӣ-гурума ва гирифтани иппон пирӯз шуд. Меҳрзод Сӯфиев дар вазни то 60 кило дар финал аз Балабай Агаеви озарбойҷонӣ шикаст хӯрд ва медали нуқра гирифт. Мадина Қурбонзода дар вазни 52 кг медали биринҷӣ ба даст оварда, яке аз ҷавонтарин барандагони ин мусобиқа гардид. Ёсин Бобокалонов дар вазни то 66 кило дар мубориза барои медали биринҷӣ бар Тойлӣ Муродови туркман пирӯз шуд.
Ҷудокорони тоҷик дар рӯзи дуюми мусобиқоти Гран-Slam-2025 ду медали тило ва як биринҷӣ ба даст оварданд. Муҳиддин Асадуллоев дар вазни то 73 кило дар даври ниҳоӣ бар Эрдэнэбаяр Батзай аз Муғулистон пирӯз шуда, аввалин медали тилои худро дар як мусобиқаи Гран-Slam ба даст овард. Сомон Маҳмадбеков дар вазни 81 кг дар қувваозмоии ҳалкунанда бар Адам Сетчоев (IJF) бо юко пирӯз шуда, медали тило гирифт. Абубакр Шеров дар вазни то 73 кило дар мубориза барои ҷойи сеюм пирӯз шуда, медали биринҷӣ гирифт.
Дар рӯзи сеюми мусобиқот Темур Раҳимов дар вазни беш аз 100 кило дар даври ниҳоӣ бар Ҷамол Ғамзатхонов (Озарбойҷон) дар вақти изофӣ ғолиб омад. Дар вазни 100 кг Ҷаҳонгир Маҷидов дар мубориза барои тило аз Ҷаъфар Костоев (АМА) мағлуб шуд. Ҷаҳонгир дар ниҳоят соҳиби медали нуқраи ин мусобиқа шуд. Кароматулло Ҳакимов дар вазни 100 кг дар мубориза барои ҷойи севум пирӯз шуд ва медали биринҷӣ гирифт.
Ба ин тартиб, дастаи мунтахаби Тоҷикистон бо 4 медали тило, 3 нуқра ва 4 биринҷӣ дар ҳисоби умумидастаии медалҳо мусобиқаро дар ҷои аввал ба анҷом расонд.
